ازيك يا ريس و اخبار السجن ايه ؟
معلش يا ريس سامحني مقدرتش اكتبلك قبل كده و احكيلك علي حصل لاني لسه خارج من المستشفي النهارده ماتقلقش هو خرطوش و اختناق بالغازو دهس بالمدرعات بس الحمد لله ربنا ستر سيبك مني المهم حضرتك و المدام و الاولاد مش بخير؟.
قبل ما احكيلك عالي حصل عايز اعتذر معلش خطي وحش اوي و ضعيف في الكتابه ماحضرتك عارف طول عمري ماشي بالدروس الخصوصيه مناهج ضعيفه و فصول بالستين و السبعين تلميذ عافرت علي قد ما قدرت و دخلت معهد كده سنتين علي قد الحال درست اي حاجه و اشتغلت حاجه تانيه غير اللي درسته المهم مش هطول علي حضرتك الله يكون في العون ما هو السجن برده شده حتي لو كان مستشفي خمس نجوم و المدام و اولادك و كل اصحابك من الوزرا اللي بتثق فيهم حواليك اهه اسمه سجن برده.
و انا في المستشفي سمعت انك بتتنقل بطياره من المستشفي للمحاكمه سبيت ميت ملله للشعب اللي زاحم الطرق بالتوكتوك و الميكروباصات و البشر اللي فوق بعض وافتكرت كلامك طول تلاتين سنه اننا لازم نضغط النفقات عشان نخرج من عنق الزجاجه و ننظم النسل عشان نقدر نسد ديون مصر وافتكرت اد ايه انا قصرت في حقك و ماسعدتكش حتي بربع مرتبي ولا نصه معلش يا ريس العين بصيره و الايد قصيره قبل ما تزعل مني اسمع بس الحكايه من اولها و الله ما طلعت المظاهره الا للشديد القوي انا مرتبي 300 جم و ساكن في شقه في العشوائيات و اسف اني افكرك بيها بس للاسف هي دي الحقيقه و الايجار هناك ب 750 جم.
ابني بيتعالج ببلاش في المستشفي اللي حضرتك تعبت نفسك و قصيت شريطها فاكرها؟ا اللي الشعب هو اللي كل سنه يحط زكاه رمضان فيها عشان تكمل دي؟ افكرك بيها اللي هيا بتاعه المرض البطال اللي بييجي من التلوث و اللبن و القمح المسرطن و اكياس الدم الفاسده ايوه عليك نور تصدق الشعب ابن التيت بيلسن علي مرات حضرتك بالكلام انها ضيعت ملايين علي مشروع وهمي اسمه القراءه للجميع عشان كده الفلوس راحت؟؟
انا دفعت التبرعات و الذكاه و الضرائب و الخصومات ومراتي باعت ذهبها القليل عشان المستشفي تكمل بس لسه مخلصتش مش عارف ليه .
والله ما خرجت المظاهره الا عشان حاجتين اولهم انهم قالولي لو عملت كده هلاقي الفرق بين مرتبي و مصاريفي و كمان هاعرف مين السبب في ارتفاع الاسعار و السبب التاني اني ارد غيبتك و غيبه المدام و قولتلهم العيب في اولادكم نظرهم ضعيف و تعليمهم قليل و جسمهم واكلاه الانيميا و حتي وجبات المدارس مسممه يبقي هيستفيدوا ازاي من المشروع العظيم ده ياو لاد التيت ان قلت كده من هنا و عينك ما تشوف الا النور يا ريس و بغالوجمال و حصنه و ضرب من كل حته و بالمناسبه دي عايز اشكرك ياريس انك اديتني فرصه اطلع في التليفزيون كان دوري حلو اوي بالظبط زي العبيد في فيلم فجر الاسلام و انا باتتدهس بالجمال و باتضرب بالكرابيج و احلي مشهد لما اترشيت بالميه الساقعه في عز الشتا و انا بصلي علي كوبري قصر النيل و الناس ولاد التيت زعلوا من شويه ميه قولتلهم ياو لاد التيت يا جاحدين احمدوا ربنا انه بيخليكوا تستحموا ده زمان فتحوا الكوبري و رموا الناس في النيل مش كده احسن و ارحم؟
بمناسبه الجمال اخبار جمال بيه ايه ؟ يا رب تكون ثروته و مضاربته في البورصه الدوليه و الشراكه بالاكراه في كل الشركات بخير, عايز احذرك يا ريس الشعب ابن التيت لسه بيلسن علي جمال بيه و بيقول انه مراته و امه كل ما يزوروهم في السجن تحصل مصيبه ال ايه حرق مسرح بالون و مجمع علمي و ضرب المسيحيين بالمسلمين و السلفيين بالاخوان و الجيش بالشعب قولتلهم يا ولاد التيت والله ما كان ينفع معاكم الا جزمه حبيبك حبيب بيه العادلي اللي نشر الحب و العدل في البلد هي المدام فاضيه لشغل النسوان ده ؟ دي جوزها و اولادها الاتنين في شده ربنا يفك كربهم عارفين السجن يعني ايه يا ولاد التيت ولا حتي الحجز في القسم شكله ايه كهربه و نفخ و اهدار للادميه وضرب و تلفيق تهم و اهانه الراجل قدام مراته عشان يعترف بالي هو ما عملوش و تقوللي حرقت مجمع علمي ,علمي ايه يا ولاد التيت هي في ايه ولا في ايه و الريس كمان مشاغله جوا السجن اكتر مما كان بره تخطيط و متابعه ازمات ما بين احتكار انابيب البوتاجاز و السولارو والسرقات و انسحاب الشرطه و غياب الامن و حياديه الجيش مع الشعب و مع المجرمين و انسحابه من الحدود الملتهبه الي الداخل و كده يعني كل ده و مش عايزينه يرقد علي السرير و يرتاح طول مده المحاكمه المخفيه اللي ما بنشوفش غير مشهد و صوله و مغادرته بالسلامه بالطياره يا ولاد التيت انا قولت كده و معرفش ايه اللي حصلي فوقت في المستشفي.
بس الحمد لله عندي خبر حلو ابني بتاع المستشفي اياه خلاص ربنا افتكره و عبئه بقي علي اللي خالقه مش علي الدوله ولا علي حضرتك ياريس والله ما هتهم حد فيه هو اللي شبط فيا في المظاهره ال ايه نفسه يتفرج علي شكل قنابل الغاز منتهيه الصلاحيه واد قليل الادب بس اوعدك ياريس ربنا يطول في عمرك و اجيب ولد تاني سليم بصحه كويسه ومتعلم كويس و عارف حقوقه وواجباته حاجه كده قريبه من جمال و علاءبيه يمكن ساعتها اقدر ابقي كويس و ماتستعرش مني وتتشرف بيا قدام رؤساء الدول و منظمات حقوق الانسان لما ييجوا يزوروا مصر و اوعدك مش هطالب باي فلوس من الل حضرتك نهبتها دي مكافئه نهايه خدمتك و لا يمكن ابصلك فيها و السلام ختام.
ملحوظه:
حسنيه مراتي بتبلغك سلامها و بتقولك لو تقدر بس تخلي الاسعار ترخص شويه لانها بقالها 8 اشهر ما داقتش اللحمه و قربت تنسي طعمها,فقريه بعيد عنك و الله ماليها الا الفول و الطعميه بنت التيت و ربنا يخليك لينا ياريس.
الامضاء: ابن التيت
--------------------------------------------------------
اعتذر عن استخدام اللغه العاميه وسأنشر خطاباتي تياعا
